【Emily】跑晒10公里 癌症康復者感激隊友陪練

【明報專訊】之前本報訪問過兒童癌病基金「同行跑步隊」嘅隊員點樣備戰渣打馬拉松，曾患生殖細胞惡性腫瘤嘅小幸同曾患血癌嘅永豐今次首戰渣馬10公里，最終佢哋都做到賽前期望完成賽事，永豐仲跑出唔錯成績，以54分27秒完成，而小幸都以1小時24分完成。

癌症康復者經過多次化療等治療之後，體能會大打折扣，賽後永豐都話好攰，但非常感動，以往多數玩球類運動例如踢波嘅佢話，由練跑到比賽都有隊員陪伴，令佢感受到跑步唔再係一個人嘅運動，改變佢對跑步嘅睇法。患病前係學校田徑隊嘅小幸都話，有隊友一齊跑步、打氣先可以堅持跑落去，同時都好欣賞自己，雖然辛苦，但全程無停低過，好似之前抗癌時堅持無放棄。

同行跑步隊喺賽前接受咗近3個月訓練，臨近比賽亦舉行啟動禮，為隊伍首次參加正式跑步比賽打氣，亦希望之後可以繼續參加唔同比賽。