【Emily】黃傑龍以身試……指定袋

【明報專訊】垃圾徵費由原定4月1日延遲到8月1日開始，稻苗飲食專業學會榮譽會長黃傑龍噚日喺facebook一連出幾個有關垃圾徵費嘅帖文，仲「以身試袋」，下半身走入「Sample」240公升商用指定膠袋做「人肉測試」，離地跳起個袋都無爛。黃傑龍打趣咁話，經過佢「呢件動態大型垃圾」初步測試，「（指定膠袋）都相當硬淨」，就算「龍爪手」抓住嗰部分都無穿。

舉幾個辦公室場景 問政府點處理

黃傑龍亦提出幾個辦公室場景，希望政府解釋，例如以用者自付原則，員工係咪要每日買微型垃圾袋裝住食完嘅飯盒，再拎去大廈公共垃圾桶，反問咁點減廢；而「如果租戶買咗指定膠袋，咁大廈嗰個（指定袋）又使唔使呢？ 如果要就雙重收費」。

佢又舉例，租戶員工去完廁所用抹手紙，係咪要用指定袋裝住？佢估計，最後要大廈管理公司買指定袋解決，即係要加管理費，由老細負責，但造成飯盒、抹手紙廢物嘅係員工，希望政府解釋咁係咪做到源頭減廢。

不過，黃傑龍都有為政府解釋坊間嘅「誤解」，例如回收品都要用指定袋，事實係只要妥善回收都唔需要用指定袋，政府一律免費收。