經濟
黃傑龍呻須多付300萬買垃圾袋
【明報專訊】垃圾徵費原定今年4月1日起實施，近日成為熱門話題，仲熱鬧過年廿八「洗邋遢」。叙福樓（1978）主席及行政總裁黃傑龍噚日上電台節目就提到，估計集團旗下食肆每年需要用多300萬元去買指定垃圾袋，加上處理垃圾人手等等，可能要用多500萬元！不過政府噚日下午已經宣布推遲到8月1日生效，相信黃生暫時都可以鬆一口氣。
黃傑龍就話，政府上年曾經向餐飲業推出良好作業指引，食肆只要將廚餘分類再送去回收就唔使支付垃圾費，不過佢公司旗下超過50間食肆，所在地點有四成商場都未有相關回收配套。佢又擔心全港只得50個回收點，街舖廚餘將會缺乏支援。除此之外，黃傑龍提到餐飲業人手不足，加上分類廚餘屬厭惡性工作，現時行業請人洗碗都難，更加難請人分類廚餘，唔少食肆都話寧願支付垃圾費。如最終無法減廢，又令業界成本上升，會變成「雙輸局面」。
