【Emily】廉署為體育界辦防貪課程

【明報專訊】廉署噚日首次舉辦體育總會誠信領導課程，為43個唔同運動項目嘅體育總會管理人員提供防貪培訓，加強體育界嘅誠信管治。體育專員黃德森話本港體育界聲譽良好，但唔可以掉以輕心，即使一宗個案都足以摧毁辛苦建立嘅形象，又舉例現時有「M」品牌計劃，畀每項合資格活動最高1500萬元資助，若總會無善用啲錢，又被懷疑有貪污成分，將令香港蒙羞。

香港國際廉政學院將喺今年首季成立，廉署防止貪污處處長莊家樂話，有關課程係學院嘅先導課程之一，期望持續提升體育領域嘅廉潔同良好管治。課程由廉署資深調查人員講解過往貪污案件嘅犯案手法；防止貪污處同社區關係處分別就各總會嘅管治、處理捐款及帳目，以及日常行政事宜提供防貪建議。另有競委會同賽馬會等嘅代表，談及體育總會入會準則同程序競爭相關事宜，又分享應用科技點樣推動體育賽事嘅誠信同公平。