【Emily】習提出 鄧家彪領智庫研港人「三感」

【明報專訊】民青局長麥美娟加入政府前，曾擔任智庫「治港新政」嘅召集人，之後交棒畀工聯會立法會議員鄧家彪。阿彪噚日話，智庫未來一年會以國家主席習近平提出嘅「三感」（獲得感、安全感、幸福感）為研究方向，收集不同學者、熟悉政策研究人士嘅建議，嘗試從科學客觀角度評估港人嘅「三感」。

愈年輕愈唔認同「基本生活獲保障」

治港新政喺舊年11月以電話訪問805個市民，當中問到係咪認同「喺香港只要有本事，加上個人努力，就有機會過好啲嘅生活」，有45%年齡介乎18至30歲嘅受訪者表示唔同意，係持負面態度最高嘅年齡組別；而年齡愈大嘅受訪者就愈多人表示認同。

問到受訪者係咪同意「香港人嘅基本生活得到足夠保障」，結果有66%表示認同，但按年齡劃分，年齡愈細嘅受訪者愈唔認同，舉例18至30歲受訪者中，就有超過六成唔認同。至於問到香港社會嘅貧富差距，唔同年齡嘅受訪者都認為嚴重甚至非常嚴重，佔整體超過八成。