【Emily】杜淦堃連任大律師公會主席

【明報專訊】大律師公會噚日換屆改選，一如本報先前報道，主席杜淦堃（Victor）同兩名副主席毛樂禮同陳政龍喺無競爭下連任，今次會係Victor第三度做主席。

根據Victor早前向會員報告總結時話，深明公會喺法治同維護公義嘅角色，今年係尤其重要一年，包括《基本法》23條立法諮詢同多宗國安法案件審訊，都係公會現屆執委會核心留任嘅重要考慮之一。

大律師公會去年恢復訪京，Victor又話內地同海外訪客陸續恢復往來，其中公會恢復北京大學普通法課程外，喺上海華東政法大學亦會開始另一個普通法課程，公會會繼續向內地法律學生同律師提供訓練。同時，公會對外會繼續提醒世界，香港仍有有力且獨立嘅大律師公會存在。