【Emily】門常開logo分紅綠藍 畀合作機構自行襯色

【明報專訊】政府噚日宣布推出全新設計嘅宣傳標誌，等市民識別政府支持或贊助嘅各項活動同計劃。政府新聞處長陳偉偉話，政府著重團隊精神，希望透過標誌突顯政府同社會各界攜手合作，「營造番一個香港大嘅團隊」為市民做事。

政府：突顯與各界合作「營造香港團隊」

新標誌有紅、綠、藍3種顏色，陳偉偉話係由新聞處自己設計，無涉及額外開支，標誌用政府總部建築「門常開」為主題，帶出政府會秉持開明、開放嘅態度，半立體同斜體設計就呈現政府嘅活力，仲有積極回應市民唔同需要嘅工作方向。至於咩時候用咩顏色，佢就話可以畀各機構按需求揀適合嘅顏色搭配。至於咩項目會用新標誌，又點同其他標誌好似飛龍圖案作區分，佢就話飛龍標誌係用嚟對外宣傳本港國際都會嘅項目，新標誌就用喺本港嘅政府資助項目等對內宣傳品。

陳偉偉又話，標誌涵蓋嘅計劃包括社區客廳、過渡房屋項目、精神健康支援熱線、大型體育活動等，除咗等市民知道活動得到政府支持同認可，亦記得政府同合作伙伴有出力籌辦。

另外，政府新聞處由下星期一（22日）起至3月26日，會喺全港舉行公眾巡迴展覽，宣傳新標誌同政府資助項目。