【Emily】工程師學會搞嘉年華 邊學邊玩有騷睇 3．1西九開鑼 逾40攤位展技術成果

【明報專訊】為咗提高公眾對工程專業嘅認識同興趣，香港工程師學會今個月下旬起會舉辦連串活動，重頭戲係香港工程師周嘉年華，3月1至3日喺西九文化區海濱草坪舉行，活動有超過40個來自學會分部及唔同公司嘅攤位，分享各類工程知識同技術，展示工程成果，另設唔同嘅遊戲區，仲邀請咗本地組合per se等歌手表演。

學會亦會喺3月9日舉辦粵港澳大灣區高校創新工程邀請賽，每隊聯隊將由一間香港院校及一間澳門或內地院校組成，每隊最多10人，賽前會提供特定規格，各隊可參照規格自行喺網上買現成遙控車，再做編程、改裝、加裝機械臂，或者參照規格組裝遙控車連機械臂。各隊須準備兩部遙控車，一部由本地院校負責，另一部由澳門或內地院校負責。全場總冠軍聯隊將獲獎盃及1萬元獎學金。