【Emily】陳茂波見沙特財長 sell港金融優勢

【明報專訊】財政司長陳茂波前日到咗瑞士達沃斯，代表香港參加世界經濟論壇年會，而中國總理李強亦都到咗，噚日向全球投資者、政界人士發表講話。陳茂波喺當地就同沙特阿拉伯財政部長Mohammed Al-Jadaan見面，推銷香港金融優勢，話香港係連接國家同全球嘅國際金融中心，歡迎沙特資金同企業利用香港呢個平台，拓展內地以至整個亞洲市場，期待與沙特有更多雙向嘅金融同商務合作。

陳茂波又先後同兩間分別從事金融科技、人工智能嘅企業代表會面，其中一間係全球第二大穩定幣發行商。佢話政府前年公布有關虛擬資產在港發展嘅政策宣言後，市場反應積極，多間數字資產及第三代互聯網公司已落戶香港，形容香港正審慎咁推進數字資產發展，歡迎以法定貨幣為基礎嘅穩定幣公司來港開展業務。