【Emily】周守仁：中梵有善意 多少有啲提防 以前煲韓劇 現臨瞓睇內地短片

【明報專訊】天主教香港教區主教周守仁樞機接受「母會」耶穌會中華省訪問時，談及日常生活點滴。現年64歲嘅佢話，平日朝早6點就會起身做伸展運動，「年紀大喇，唔伸展關節唔好，做push up、sit up（掌上壓、仰臥起坐）呢啲」。

住喺黃竹坑聖神修院嘅佢又話，自己唔揸車，平時一係輔理主教夏志誠或副主教蔡惠民車埋佢，或者自己坐地鐵轉巴士返工，「所以搭公共交通見到我，係好平常嘅事」。

6點起身做伸展 巴士通勤「好平常」

周樞機喺訪問中都被問及一日咁忙，會唔會唔夠時間休息，佢就話大學時期已經一日瞓得5個鐘，?家就更少，不過午飯後會小睡一陣。訪問披露，原來周樞機以前都會睇下韓劇，只係?家無咩時間，佢笑言「已經知啲橋段係點」，亦會臨瞓前睇下普通話宮廷劇短片，又或內地農家生活短片。

至於中梵關係，佢話睇到雙方都有善意，但未夠信任，多少有啲提防，「（我）估下你諗乜、你估下我諗乜」，而中國政府內都有唔同聲音，「唔係個個想行同一條路」。佢希望雙方繼續保持溝通，「唔易行條路，但唔好放棄」，同時外界有時對內地睇得好負面，「唔係話幫北京，大家應該客觀啲睇對方」。