【Emily】臨飛達沃斯 陳茂波主禮中環共融跑ACCA活動

【明報專訊】中環噚日「日繽紛」，有兩項活動上下午舉行，同由財政司長陳茂波主禮，而財爺晚上就啓程去瑞士達沃斯出席世界經濟論壇年會。其中由東華三院舉辦嘅「奔向共融」特殊馬拉松朝早喺中西區海濱長廊及龍和道舉行，有逾4000名智障跑手及伴跑員參加。賽事二人一組，跑手同伴跑員有老有嫩，唔少隊伍手拖手作賽，宣揚傷健共融，跑手見到記者嘅鏡頭不忘揮手，沿途有人同跑手擊掌打氣。

活動設男女子3公里挑戰盃及共融跑，亦為6至11歲智障兒童及其家人而設嘅1.5公里「傳．家跑」，後者有逾130個家庭參加。馬會董事黃嘉純話樂見跑手、團體同義工數目大增，反映賽事有效推廣傷健共融同健康生活信息。翻睇資料上年有逾1700名智障跑手同伴跑員參加。

同日，特許公認會計師公會（ACCA）香港分會喺遮打道行人專用區舉行第26屆「ACCA公益關愛日」，善款會捐贈本地慈善組織。曾任ACCA分會會長嘅陳茂波話正準備預算案，滿腦子都係公共財政嘅可持續，而ACCA香港分會每年都為財案提供寶貴意見，盼參加者繼續喺專業領域發揮所長，貢獻社會。