【Emily】都大校長賀年卡寄逾300在囚生

【明報專訊】現時部分在囚嘅人有修讀都會大學課程，部分用遙距方式。都大校長林群聲上月就收到一封好窩心嘅聖誕卡，寄信者係在囚學生，對方除咗話多謝都大，仲留言提醒：「天氣會凍校長記緊要著多件衫，保重好身體！」

林群聲話?家唔少人會寄電子賀卡，撳個掣就可以送上問候同祝福，但呢種方式唔適用於一班在囚者，佢於是仿效同學，趁新一年親手簽心意卡，寄畀今個學年在囚嘅大概250個都大學生。呢批學生有七成半讀緊學士課程，一半係教育及語文學院嘅課程，其餘係商業管理或人文社會科學範疇。

除咗以上嘅同學，林校長亦將祝福送畀75個立德學院學生，祝佢哋每天過得充實，身體健康，平安喜樂。立德學院設於白沙灣懲教所同羅湖懲教所，為自願參與嘅成年在囚者提供一年全日制應用教育文憑課程，由都大李嘉誠專業進修學院派教師授課。