【Emily】油尖旺區會小組會議 兩缺席一遲到 鄧銘心唔見人冇申報 鍾港武有申報

【明報專訊】油尖旺區議會嘅提振地區經濟專責工作小組噚日首次開會，根據區議會網頁，小組有17個成員，但噚日只得15人出席，缺席嘅分別係民建聯鍾港武，同埋地委會界別嘅鄧銘心，前者有向小組主席葉傲冬申報。會後Emily問過葉傲冬，佢話唔知鄧銘心會缺席，稍後會問番佢缺席原因。Emily噚日嘗試打畀鄧銘心，但聯絡唔到佢。

陸子峯遲到半小時 話有緊急公務

小組噚日下晝兩點半開始，地委會界別嘅陸子峯接近三點先到，Emily問過佢，佢話因為有緊急公務要處理，所以先遲咗，會前有同葉傲冬申報。

政府早前公布《區議員履職監察制度指引》及《區議會常規 》範本，列明區議員每年會議出席率唔可以低過八成。

另外，承辦元朗瑞華區關愛隊嘅「元朗民生服務處」終止服務，係首次有承辦團體退出，隊長周永勤批評區議會新制度受操控，決定退出政壇。特首李家超噚日出席行會前向傳媒話，對於想參選但達唔到要求嘅人，應該檢討自己點解得唔到提名或選民支持，如果任何人只為金錢目的謀取職位，並唔係政府所想要嘅熱誠同承擔。佢又話，希望參與關愛隊嘅人非常多，強調「有心人多的是」。