【Emily】何敬康倡推折扣券 消費額可扣酒店錢

【明報專訊】近日大批內地遊客來港跨年倒數後滯留，引起社會討論，新民黨立法會議員何敬康噚日去信財政司長陳茂波，建議推出「訪港旅客消費折扣券」計劃，希望可刺激來港遊客過夜同消費，建議之一係遊客拎住在港消費、用餐嘅單據，可兌換其消費額10%至15%面額嘅酒店折扣券，消費愈高折扣率愈高。

何敬康話，因應內地遊客滯港一事，佢同業界商討過，認為消費折扣券值得政府認真考慮，獲得嘅酒店折扣可即時用喺入住本港酒店，就算已預訂酒店，都可改換消費折扣券。何敬康希望政府把握未來一個月內有著名體育明星訪港、農曆新年假期等時機，盡快研究同落實。

保險界立法會議員陳健波亦提出，香港要搞好旅遊，就要做好3件事，首先提高住宿、飲食嘅性價比，做到物有所值，留住本地人，亦可吸引遊客；其次延長口岸通關時間，改善口岸交通，並採用好似自動過關等嘅措施方便遊客；最後就係多發展深度遊，吸引遊客喺香港留耐啲。