【Emily】旁聽西貢區會 前主席：DO似班主任

【明報專訊】新一屆區議會開鑼，民主派絕迹，但噚日西貢區議會首次開會，原係民主派嘅該區前主席周賢明就在場旁聽。佢同Emily講，新制下開會「好似班主任同學生嘅關係」，提到有議員私下對民政處「打卡點」建議有保留，惟會上無人表達，冀一眾議員更踴躍表達意見，「唔好諗住有底線、紅線」。

周賢明與屬於民建聯嘅西貢區議會前主席吳仕福一齊旁聽首次大會，會後二人同新任主席民政專員馬瓊芬同埋全體議員合照。

周賢明認為，首次會議行政主導明顯，民政專員猶如班主任。佢提到會後有議員私下對民政處提出嘅「打卡點」建議有保留，惟會上無人反對，「點解嗰時（會議上）唔講？佢哋要慢慢培養信心，唔好諗住有底線、紅線。」

噚日會議較原定提早約半個鐘完會，部分議程僅幾名議員發言。周賢明認為可以畀更多時間議會新丁熟習，期望議員主動接觸持唔同意見嘅居民，並繼續跟進野鴿、海水化淡廠等地區問題。