【Emily】討論在院舍離世 多人超時無截停 謝偉俊唔限發言 議員致謝

【明報專訊】立法會一個附屬法例小組委員會噚日討論修例容許院友喺院舍離世，有議員發言後多謝主席謝偉俊不設發言時限，仲容許議員三輪發言。謝偉俊亦有感而發，話「唔係我特別好，其實唔應該係咁」，只要議員發言同會議內容相關或合情合理，身為主席應該要為議員提供充分時間同自由度。

噚日會上多個議員同官員發言超時，謝偉俊無即刻截停，仲幫議員追問同要求官員補交文件。佢喺會議第一部分結束後話今屆議會特別加強效率，但喺發言時間同自由度等方面對議員發揮作用嘅限制太多，今次草擬條文相對簡單，所以希望議員可以喺政策層面講多啲。

話今屆議會對議員限制太多

新一屆立法會下周三（10日）開始，噚日舉行今屆最後一次內務委員會，亦係馬逢國最後一次以內會副主席身分出席會議，內委會主席李慧琼喺會議之初同結尾都感謝馬逢國任內盡心盡力、貢獻良多，又話二人過去一直合作無間，「再次感謝馬逢國對內會工作的熱情、熱誠、投入、盡心盡力」，全場議員兩度鼓掌，馬逢國最後都鞠躬致謝。