【Emily】調查：港人雪季旅行日花4800元 冠亞太

【明報專訊】唔少香港人冬天會選擇去落雪嘅國家旅行，度假村公司Club Med噚日發表有關雪季假期嘅趨勢調查報告，日本依然係最受港人歡迎嘅雪季假期目的地，佔39%，其次係瑞士（30%）同加拿大（29%）。而港人每日嘅行程預算超過4800港元，同馬來西亞一樣，冠絕亞太區。

調查訪問3500個亞洲旅客，香港同馬來西亞外，每日行程預算花費最多係台灣人，約499歐元（約4270港元），預算相對較少嘅係韓國同日本，每日預算分別係276歐元（約2360港元）及250歐元（約2140港元）。

有54%受訪者話，冰雪活動如滑雪等可以帶嚟刺激同樂趣，而香港受訪者特別覺得，冰雪活動可以提升個人形象，係成功嘅身分象徵。有趣嘅係，香港人雖然鍾意去日本過冬天，但就認為寒冷天氣係去滑雪假期嘅最大障礙。