【Emily】消委開Ig 講消費貼士《選擇》重點

【明報專訊】今年係消費者委員會成立50周年，會方噚日開設咗官方Instagram帳戶「消費者委員會 Consumer Council」，話今年會舉辦一連串精彩嘅周年慶祝活動，打頭炮嘅就係開設Ig帳戶喇！消委會喺首則Ig帖文話，將會喺Ig發布每月最新一期《選擇》月刊嘅重點報告、實用嘅消費貼士、消委會嘅最新活動、同埋有獎遊戲等。

消委會噚日喺Ig新增咗3則帖文，其中第三則提到，消委會每個星期都會為市民網羅坊間最常見嘅消費問題，內容覆蓋衣食住行。

黑客取覽資料遠少於預期

另外，消委會電腦系統舊年9月曾經受到惡意勒索軟體攻擊，被盜嘅涉及員工同客戶數據，以及其他內部紀錄。消委會噚日向部分訂戶發電郵，話外聘嘅鑑證專家已做咗深入調查，根據調查結果，攻擊者喺事件中曾取覽嘅資料遠低於最初嘅風險評估，受影響嘅人數亦相當有限，會方已另外通知個別受影響嘅人。