【Emily】搵人入3個委會 油尖旺區會靜晒

【明報專訊】新一屆油尖旺區議會噚日首次開會，唔少人都留意一班新任區議員嘅表現，Emily噚日去旁聽，發現區議員都好踴躍發言，但當議程傾到邀請各人代表區議會出任3個委員會時，現場突然靜晒，其中食環署轄下嘅「街市管理諮詢委員會」無人主動舉手加入，最後區議會主席就指示將相關文件傳閱畀各區議員，呼籲大家加入。

至於油尖旺多元文化活動中心嘅督導委員會就需要有兩個代表，主要監督中心運作，聽取年度報告同核數報告等，該中心諮詢委員會就需要一個代表，主要蒐集意見。區議會主席詢問完有冇議員想加入嘅時候，過咗大概兩分鐘都無人舉手，最後由地委會界別區議員楊鎮華、委任區議員歐楚筠打破沉默，開口加入督導委員會，尼泊爾裔嘅委任區議員Aruna Gurung就加入諮詢委員會。