【Emily】民青局新制服 港鐵書法家為18區揮毫

【明報專訊】民政及青年事務局喺新一年換新制服，局方噚日喺社交平台介紹新制服背後嘅故事，話構思來自深水埗民政處舉辦嘅「別出深裁」時裝設計比賽，由比賽顧問、香港設計師何國鉦同參賽嘅年輕人設計，制服上嘅字就由為港鐵車站題字嘅書法家區傑棠負責。

新制服以綠色同白色為主，民政總署嘅外套係綠色，民青局話係象徵民政團隊以熱誠、活力同幹勁，致力建設健康和諧社區；而各區民政處嘅白色風褸就係以奔流脈搏為設計意念，象徵18區民政處全面掌握地區脈搏，與時並進，提供切合市民需要嘅服務。

民政總署嘅外套背後寫上「民政」兩字，民政處嘅風褸就有各區嘅區名，全部由為港鐵車站題字嘅書法家區傑棠揮毫。翻查資料，區傑棠本身係港鐵建築師，已經退休，早排佢都有為屯馬線各站嘅站名題字。