【Emily】橫額賀「2420年」 民建聯暗示被惡搞

【明報專訊】每當大時大節，好多立法會議員同區議員都會製作橫額增加氣氛。近日網上流傳一張相，相中掛喺行人天橋上嘅民建聯橫額寫上「2420年新年快樂」，但用「笑哈哈」表情符號遮住議員個樣，仲話係「400年一遇」。

其實呢幅橫額係民建聯主席陳克勤聯同該黨大埔區議員胡綽謙同李文傑掛出，噚日陳克勤同胡綽謙分別喺facebook貼出兩張相，一張係橫額上寫咗「2024年新年快樂」，另一張就係「2420年新年快樂」，話祝市民2024年新年快樂，但有鍾意做「勞作」嘅小朋友想祝大家「2420年新年快樂」，似乎暗示有人惡搞。

有網民上載「2420年新年快樂」嘅橫額相後，有其他網民留言問係咪「P圖」（改圖），發帖者就叫大家落現場睇。雖然暗示被惡搞，不過陳克勤同胡綽謙都話，無論係2024定2420，新年快樂都係重要，希望大家新一年笑哈哈。