【Emily】「奇妙年年」賀新春 郎朗奏迪士尼名曲 45分鐘售980起

【明報專訊】元旦過後，好快就到農曆新年，香港迪士尼樂園噚日宣布1月25日至2月25日舉行「奇妙年年」龍年新春慶祝活動，而1月27日更邀請世界知名鋼琴家郎朗到場演奏多首迪士尼經典樂章，標準同VIP座位區通行證分別980元同1480元（唔包入場券），今日中午起公開發售。

「迪士尼經典音樂Live——郎朗領銜演奏」演出時間由晚上7時半至8時15分，歷時45分鐘，而今次嘅音樂會中，郎朗會與同台演出嘅弦樂四重奏樂團合作，配合舞台視覺特效，演繹多首經典迪士尼樂曲，包括《獅子王》嘅Can You Feel The Love Tonight？、《魔雪奇緣》嘅Let It Go，同埋《世界真細小》等。

今午起發售 唔包樂園票

今日中午12點起，大家可以喺香港迪士尼樂園度假區官方網站預先購買980元嘅標準通行證，同埋1480元嘅VIP座位區通行證。官網另外會喺1月10日開始接受限定嘅龍年特別版Duffy同好友毛公仔預訂。「奇妙年年」龍年新春慶祝活動期間，米奇老鼠、米妮老鼠仲會同其他迪士尼角色，以全新賀年服裝登上城堡舞台表演。