【Emily】龍獅節復辦128條金龍舞動

【明報專訊】因為新冠疫情停辦3年嘅香港龍獅節，噚日元旦日復辦，今年龍獅節以龍為主題，一共有128條金龍喺尖沙嘴文化中心露天廣場舞動，吸引大批市民及旅客近距離觀賞表演，場面熱鬧。今年嘅金龍巡遊隊伍，有一半來自香港嘅中、小學及幼稚園學生，香港龍獅節籌備委員會召集人顏汶羽表示，希望香港新一代可以將龍獅文化傳承下去。