【Emily】狄志遠台灣觀選 去晒3候選人競總

【明報專訊】台灣大選下周舉行，過去不論建制或泛民政團都會去台灣觀選、取經。新思維立法會議員狄志遠噚日就上載咗去台灣嘅相，提到佢哋去台灣見朋友，噚日下晝亦去晒3個台灣總統候選人嘅選舉總部參觀，同埋分析3個陣營嘅選舉策略。

狄志遠分析，話白營民眾黨嘅選舉團隊包裝專業，年輕化，明顯係爭取年輕票同中產票；藍營國民黨就以老實做包裝，同埋賣鄉情，狄志遠認為佢哋藉此鞏固同集中藍營票源。至於綠營民進黨，佢就形容係日式包裝，主打動物權益、運動本色。

1月13日就係台灣大選，狄志遠話根據近日嘅台灣民調，勝負差距嘅百分點係個位數，所以佢相信，嚟緊呢個幾星期候選人仍會繼續出招。除咗新思維，今次選舉相對少香港政黨去當地觀戰，據早前報道，擔任民協顧問嘅前議員馮檢基，下星期會以傳媒身分舉辦觀戰團，佢亦早於約兩個月前籌備，認為係了解選情，唔擔心受《港區國安法》影響。