【Emily】反詐騙中心發短訊 警示潛在受害人

【明報專訊】警方反詐騙協調中心嘅「騙案預警」計劃，今日（2日）開始新增用短訊方式聯絡潛在受害人，適時發出警示同建議。協調中心喺通訊辦登記咗發送人名稱「#ADCC18222」，會透過短訊向市民發出警示，提供遇到懷疑騙案時嘅查核同求助方法；警方重申短訊唔會附有超連結，提醒市民小心不法分子透過可疑超連結、二維碼或附件，喺市民嘅設備植入惡意軟件，從而攞到敏感資料。

「騙案預警」計劃去年5月推出，協調中心同12間零售銀行合作，透過警員或銀行職員打電話或親身聯絡潛在受害人。當局除咗發出警示同建議，亦會提供涉案銀行帳戶等資料，畀受害人核實同評估。截至上年11月底，已經成功勸阻超過579人繼續轉款畀騙徒。

警方提醒，警務人員同銀行職員喺任何情况下都唔會要求市民披露個人資料或銀行認證資料，亦唔會要求市民轉移款項到任何帳戶，市民可直接聯絡銀行或協調中心，核實來電者身分；又或者用「防騙視伏器」同「防騙視伏App」，查核收款人銀行帳戶同騙案有無關聯，同查證交易伙伴係咪可疑或高危。