【Emily】江玉歡點評大馬市集 諗起廟街未來

【明報專訊】不少立法會議員趁休會期間外遊兼「考察」當地民情，選委界議員江玉歡（Doreen）最近去咗馬來西亞檳城、怡保及馬六甲，休息之餘，睇吓當地出名嘅舊城同夜市。

Doreen話檳城嘅市集已無太大特色，遊客唔多，非常可惜；相反怡保嘅二奶街（二奶巷）市集和馬六甲嘅Jonker Street則遊客絡繹不絕，認為原因係呢兩個市集滲出嚟嘅歷史與文化，和與周圍環境嘅結合，所以成功吸引遊客。佢認為，市集要有深度和賣點，需要時間打造，與當地文化及歷史結合，檔口及食物次要，重點係小販、遊客及周邊環境交織出來嘅熱鬧感覺。

反觀香港，Doreen認為要搞夜市、市集，就要諗香港嘅特色仲有幾多，點樣保留特色，而唔係為做而做，「沒有歷史與當地背景的夜市，沒有靈魂，只有軀殼」。佢問到油麻地廟街嘅賣點係咩呢？未來油旺區重建，廟街何去何從，政府當局有冇諗過？