【Emily】旅發局搵尹光重錄《廟街》MV

【明報專訊】旅發局聯同油麻地廟街販商商會等搞嘅「食聚廟街」近日頗受市民歡迎，最近旅發局仲搵埋有「廟街歌王」之稱嘅尹光，到廟街重新錄製佢經典歌曲《廟街》嘅MV。新版《廟街》MV除咗介紹廟街各式美食、平民購物等地道文化體驗，尹光仲穿起閃令令嘅銀色外套，同外國遊客到大牌檔品嘗港式炒東風螺、體驗靈雀占卜、試食飛機欖等。尹光形容今次拍攝係「寓工作於娛樂」，拍得相當投入，不過新版MV就暫時未有得睇。