【Emily】興、運、選、民、簡、旅、夜、守、復、治 民建聯公布候選年度漢字

【明報專訊】民建聯今年繼續舉辦「年度漢字評選」，噚日公布候選嘅10個字，分別係「興、運、選、民、簡、旅、夜、守、復、治」，喺1月2日至2月1日期間，市民可以喺民建聯微信小程序投票，仲有機會獲得華為手機一部，名額5個，另設30個安慰獎，各有300元超市禮券。

民建聯副主席陳學鋒、秘書長兼候任油尖旺南區議員葉傲冬、候任沙田區議員陳壇丹就一齊揀「興」。陳學鋒同葉傲冬都話，過去一年香港喺復常狀態，市面興旺，希望「興」可延續到下年，甚至之後嘅日子。至於候任西貢區議員施彬彬就揀「復」，因為2023年最深刻嘅始終係疫情過去、社會全面復常。

民建聯自2013年起舉辦「年度漢字評選」，上年嘅年度漢字「通」有通關之意。至於今年最後十強嘅漢字中，「簡」除咗代表唔少人疫後奉行簡約主義，葉傲冬話仲代表「簡約公屋」，「希望更多人盡快上樓」；而「旅」代表通關後港人都復常去旅行旅居，不時北上消費；「運」就代表港隊今年喺成都世大運同杭州亞運奪佳績。