【Emily】梅儒瑞街市實戰粵語 網民提議挑戰澳牛

【明報專訊】唔少市民會趁冬至前後買餸做節，美國駐港澳總領事梅儒瑞早前就去北角春秧街街市買餸，仲全程用廣東話同檔主對談，分別買咗菜心、叉燒同蝦，檔主仲讚佢廣東話講得好。

美國駐港澳總領事館噚日喺facebook發布短片，來港上任一年多嘅梅儒瑞去到春秧街街市買餸，話要練習一下廣東話。佢首先去咗菜檔買菜心，主動問「搭棵葱得唔得？」之後去到一間燒臘店買叉燒，指明要半肥瘦，因為佢話「唔鍾意太肥」。梅儒瑞最後去到海鮮檔買蝦，對方讚佢「你廣東話好」。

雖然梅儒瑞嘅廣東話未算好純正，但唔少網民都留言讚佢貼地同尊重本地文化，願意入鄉隨俗講廣東話買餸。亦有網民建議佢下一次「挑戰下澳牛同九記先」，唔知佢會唔會接受挑戰呢？