【Emily】林素蔚帶團考察山東 網民續問日本「考察」成果

【明報專訊】聖誕假期立法會休會，部分議員趁機出外考察。其中「A4聯盟」林素蔚（圖後排右，林素蔚fb圖片）就率領3間中學嘅師生去山東考察，噚日就參觀齊魯工業大學，體驗傳統陶瓷同剪紙創作。不過，網民似乎仍然關注佢早前去日本東京表示買唔到Suica交通卡嘅爭議，紛紛留言叫佢公布喺日本嘅「考察」成果。

林素蔚正率領創知中學、棉紡會中學、香港道教聯合會圓玄學院第三中學嘅師生到山東濟南交流，前日先同山東省統戰部官員交流，噚日就去齊魯工業大學參觀，仲一齊整陶瓷。佢提到影星周星馳同張曼玉主演《家有囍事》時，二人整陶瓷然後接吻嘅「巴黎鐵塔反轉再反轉」經典劇情，話意外有同團學生亦知道呢個畫面。

不過唔少網民未有聚焦林素蔚嘅山東行程，反而繼續關注佢早前到日本聲稱「考察」，好多人留言追問佢考察成果，更有人開設名為「支持林素蔚議員盡職到日本考察，並及早發佈考察成果」嘅facebook專頁，不過Emily噚晚暫時只見一人讚好。