【Emily】孫玉菡認同留學係試煉 畀仔女決定

【明報專訊】勞福局長孫玉菡接受接受馬會刊物《駿步人生》訪問，主管勞工事務嘅佢自言係「阿勞」，「我嘅標準工時，係除咗瞓覺以外，因為很多時候腦袋郁緊」。佢又分享「湊仔經」，話與一對子女相處係紓緩壓力嘅良方，一直視子女為朋友，會放手畀佢哋自己做決定。

孫玉菡喺訪問中與馬會公司事務執行總監譚志源對談，佢話每朝6點起身，返工前盡量抽空散步半個鐘，認為會令人精神好多。孫玉菡會同13歲女兒和11歲兒子天南地北，形容同佢哋相處係解壓良方，夜晚會分享歷史、文化故事。佢視仔女為朋友，樂於聆聽佢哋所需所想，又認同子女到海外升學係一種試煉，不過佢哋好愛香港，由佢哋自行決定。

加入官場近30年，孫玉菡憶述2002年為時任財政司長梁錦松撰寫其任內首份《財政預算案》，當時壓力好大，需於3個多月內完成工作。佢記得首次與梁錦松見面時，對方向佢展示過百款維他命丸，叫佢揀啲嚟食，仲推介佢閱讀講述因小事引起社會改變嘅The Tipping Point，同埋分析全球化下市場變化嘅Global Squeeze。