【Emily】沙田區議員：某啲特殊情况 告別演唱取消 網民留言「大家明嘅」

【明報專訊】沙田區議會主席麥潤培出名鍾意唱歌，適逢區議會任期就嚟完結，佢早排就計劃同同區議員許立燊、鄭仲恒喺年尾（31日）喺社區中心搞個「告別再遇」演唱會，但佢哋3個噚日突然喺社交網站宣布取消演唱會。麥同鄭嘅帖文提到係因為某啲「特殊情况」而取消；許就話為免觸及敏感神經，已將歌單一改再改，最終仍事與願違。Emily打電話了解過，麥話三人都唔會回應事件，亦無透露取消原因，只係話希望順利完成任期。

麥潤培同鄭仲恒噚日相繼宣布取消演唱會，同時多謝市民一直以來嘅支持，「後會有期」。鄭仲恒就話自己早前已更改歌單，希望令活動順利舉行，但事與願違，「有時候很多東西就是容不下來」。部分網友留言話「大家都明嘅」、「唱歌都不可抗力」，仲有人創作咗首藏頭詩，暗諷被噤聲。

Emily見麥潤培5日前仲好興奮咁喺社交網站宣布自己印咗300張演唱會飛，預計到時社區會堂會破紀錄咁坐足咁多人。曲目方面，麥就預告過會同許立燊合唱一首改編自《起風了》嘅歌，表達兩人嘅深厚友誼。