【Emily】官員議員滬考察 坐無人駕駛車

【明報專訊】發展局聯同立法會發展事務委員會近日去上海考察，噚日行程之一係參觀臨港新片區，一行人體驗無人駕駛的士、自動駕駛巴士，不過部分無人駕駛仍在試驗階段，所以要有個司機以防萬一。有份試坐無人駕駛汽車嘅民建聯議員林琳話，車內一名安全人員會拎住遊戲控制桿款式嘅遙控器，陪議員搭車之餘，仲介紹點樣打機式控制駕駛。

根據林琳所講，臨港新片區位於上海遠郊一帶，內有500公里長嘅自動駕駛開放道路，乘客可透過掃碼乘坐區內交通運輸工具。一班官員同議員就搭咗自動駕駛的士、廂型公交同SmartBus大巴，林琳形容廂型公交好特別，入面似纜車，並配備智能化輔助駕駛系統，有360全景環視系統、碰撞預警系統、盲區監測系統等。

除咗搭無人駕駛車，一行人朝早先拜訪「上海市住房和城鄉建設管理委員會」，就城市規劃同管理、防災防洪應急、舊區重建等方面交流。發展局長甯漢豪提到，香港同上海喺城市規劃、舊區重建同打造宜居城市方面都面對類似挑戰，過程中要兼顧社會唔同需要，認為今次交流可以從中學習、借鑑建委嘅經驗。