【Emily】青年宿舍以其命名 甘比仔仔設計「仲學舍」logo

【明報專訊】位於深水埗鴨寮街嘅青年宿舍項目「仲學舍」噚日舉行啟動禮，項目由劉葉淑婉紀念慈善基金及華人置業集團合作推出，華置行政總裁陳凱韻（甘比）都有到場「剪綵」。仲學舍以甘比仔仔劉仲學命名，甘比話，原來個logo都係仔仔設計。

仲學舍今年8月開放申請，提供42間房、最多84個宿位，每個宿位平均月租3000元，包括水費、電費、無線上網費等，甘比話目前出租率已超過90%，只剩兩間房未租出。

有份出席啟動禮嘅民青局長麥美娟致辭話，「將酒店和旅館轉作青年宿舍用途的資助計劃」由年初推出至今已批出3個項目，仲學舍係首個喺九龍區嘅項目，之後民青局會同投資者及理財教育委員會合作，以青年宿舍做試點，為青年提供財務規劃輔導服務。