【Emily】議員訪外勞宿舍 1800伙出年料滿

【明報專訊】立法會休會放假，各委員會有安排唔少活動同外訪。發展事務委員會一行人噚日去咗上海考察，發展局長甯漢豪都有隨團，噚日先去參觀上海市水務局。民建聯林琳話，上海市水務局負責城鎮水務設施，包括興建及運作供水、排水、污水、污泥處理等基建設施；制定洪水、旱災防治規劃等工作，即係食水污水防洪都係呢個局負責。林琳話極端天氣嘅威脅愈趨嚴重，香港近期都受暴雨侵襲，今次考察就可以觀摩一下上海嘅防汛工作。

3日嘅行程亦會考察上海城鄉建設、新發展區及古蹟保育。議員江玉歡話，上海同香港都係國家具有特殊地位同功能嘅中心城市，喺城市發展、商業模式、文化保育方面有好多經驗可以互相借鑑。

另一邊廂，人力事務委員會噚日就去咗元朗潭尾參觀建造業外勞宿舍，仲同工人交流。宿舍10月已啟用，提供1800個單位，最多可住7000個經建造業輸入勞工計劃引入嘅勞工。議員顏汶羽獲告知宿舍?家住咗349人，主要來自廣東同河南，預計出年會滿額。出席嘅議員建議當局加強向輸入勞工宣傳有關職安健同僱員權益嘅信息。