【Emily】沙頭角開放 元旦起有新景點

【明報專訊】第二期沙頭角開放計劃會喺元旦日開始，首階段每日容許最多1000個旅客經網上申請禁區許可證，名額包括700個旅行團同300個個人旅客，可以喺指定日期朝七晚九進入除中英街外嘅整個沙頭角遊覽。Emily噚日晏晝睇吓申請網站，元旦同1月6日（周六）嘅申請配額已滿。

第二期計劃多咗好多新景點，包括中英街檢查站前嘅中英街花園，內有可以眺望中英街嘅許願瞭望台、模仿香港舊式火車站同1比1火車頭；另有展示國家級非物質文化遺產沙頭角魚燈舞場景嘅魚燈廣場等。

保安局話，旅行社同旅客可以先到先得方式，登入警務處網上服務申請平台，免費申請電子旅遊禁區許可證，申請需時3個工作天，1月嘅名額正開放申請，之後每個月首日都會接受下一個月全部日子嘅申請。旅客亦可直接聯絡持牌旅行代理商報名參加旅行團，代理商會代辦申請手續。

另外，沙頭角郵政局喺元旦日照常營業，到時會發售6款以沙頭角攝影及短片比賽得獎作品為藍本嘅明信片，同提供兩款由保安局設計嘅全新紀念印。呢批明信片同紀念印都係沙頭角郵政局「獨家」提供，好有紀念價值。