【Emily】5G校園應用賽 車輛蜂鳴器奪冠

【明報專訊】通訊事務管理局辦公室最近搞咗個5G校園應用創作比賽，希望增加學生對5G技術同應用嘅了解，培育創科人才。奪得冠軍嘅天主教南華中學學生設計出車輛檢測蜂鳴器，係運用5G技術嘅警報系統，當有車駛近，蜂鳴器會亮燈同發出聲響，提醒行人注意路面情况。帶領學生參賽嘅教師吳偉軒話，希望車輛檢測蜂鳴器將來可在校內應用。

大會收到嚟自29間中學33支隊伍提交嘅作品。通訊辦特別為參賽隊伍提供培訓課程，教授擴增實境同虛擬實境嘅製作技巧和設計、最新三維設計趨勢同應用、基本編程概念與運用，以及演講技巧等，幫學生將其概念具體化。基督教宣道會宣基中學學生設計配有5G技術嘅健康監測手環，幫學校實時關注有需要學生嘅健康情况，作品獲得亞軍。金巴崙長老會耀道中學學生設計嘅智能溫室控制器獲季軍。