【Emily】過渡屋尚晉坊入伙禮 樓長制增互助

【明報專訊】赤柱過渡屋「尚晉坊」噚日搞入伙禮，提供40個單位，面積介乎166至480呎。負責營運嘅香港仔坊會話，首輪住戶已於4月底簽約並喺5月入伙，?家入住率約90%，大部分住戶來自港島區嘅不適切居所；尚晉坊唔會設立物管公司，由住戶自行管理，並設有由住戶擔任「樓長」嘅制度，每月開會交流屋苑大小事務。

尚晉坊位於赤柱佳美道5號，由前聖公會赤柱小學舊校舍改建而成，提供共40個1至5人單位，租金介乎2515元至6695元。所有單位配備獨立廁所、浴室同煮食空間、冷氣機、洗衣機等基本家電；尚晉坊亦設有共用休憩設備、多用途運動場等。

坊會理事長周其仲話，期望住戶喺4年入住許可期內發揮鄰舍互助精神，群策群力地參與屋苑管理，並加強住戶之間嘅聯繫同互助，建立友善、互惠互助、具人情味嘅社區。「樓長」羅先生就分享話，今年掛9號波同暴雨時，佢都有主動關心鄰居仲分享埋儲糧，幫手清理樹葉雜物，由「受助者」成為「施助者」。