【Emily】候任區議員今上培訓班

【明報專訊】新一屆區議會1月上任，一眾候任區議員今日上培訓班。民政及青年事務局長麥美娟噚日喺無綫節目《講清講楚》提到區議員會有履職監察機制，亦有負面行為清單，包括接收、轉介市民投訴等，確保其工作可以達到市民期望。佢講明區議員嘅工作係幫政府推廣政策，但如果仍有市民反對，區議員就要將意見收集，再反映畀政府，認為唔存在矛盾。

今屆區選投票率只得27.54%，被問到滿意與否，麥美娟就話選舉目的係選出一批有心、愛國愛港嘅人服務社區，目的已達，仲覺得今次有百幾萬市民參與投票，顯示市民非常支持。

來屆區會直選議員唔夠兩成，且選區面積都比以前大，麥美娟認為，嚟緊區議員要服務嘅範圍大咗，都係一種方法令區議員唔好等到選舉後先做嘢；又認為大家都希望有一個目標，喺地區工作方面可以全面覆蓋市民，嚟緊唔會再出現一條屋邨有幾個區議員辦事處嘅情况，區議員唔會「爭嘢做」，認為市民求助唔再有地域界限。