Emily Online｜九巴90周年晚宴 林世雄致辭透露有家人曾任職九巴 (14:57)

九巴日前舉行90周年晚宴，運輸及物流局長林世雄都有出席，林世雄致辭嘅時候分享自己同九巴嘅淵源，自爆原來有家人曾經做過九巴，又話細個成日同父母搭九巴由大埔去元朗，經過大埔中心到大埔墟之間嘅天橋成日都會見到巴士迷拎住相機影巴士，印象深刻。

九巴日前嘅晚宴除咗請到林世雄、仲有請到運輸署長李頌恩，同埋上任署長、現任房屋局常任秘書長羅淑佩等官員出席。九巴喺晚宴上亦都向員工頒發不同獎座，表揚員工長期緊守崗位為市民服務，當中就有兩名30年一直保持良好駕駛紀錄車長獲獎。

九巴又話，九巴服務同市民息息相關，同香港發展環環相扣，依家員工數目達到1.3萬人，形容自己為呢1.3萬個家庭帶來穩定收入，未來會將繼續喺巴士服務、智慧創新及環保方面繼續推陳出新，同香港以及所有員工攜手同行邁步向前。