【Emily】馬斯克阿媽遊港 話見到好多Tesla

【明報專訊】香港開關後多咗國際旅客，Tesla創辦人馬斯克（Elon Musk）嘅阿媽Maye Musk近日都嚟咗香港，仲喺中環同金鐘鬧市影相，上載到阿仔持有嘅社交網站「X」（前稱Twitter）。佢又喺香港鬧市影低多架Tesla，話喺香港見到好多呢！

75歲仍做緊模特兒嘅Maye，前日上載喺香港影嘅相，佢著住牛仔褲同帆布鞋，走勻長江公園、中環至半山自動電梯同大館，佢留言話好鍾意探索唔同城市，今次喺香港觀光，大讚香港嘅公園好靚。

睇番Maye嘅社交網站，今次估計係佢第三次訪港。佢9月時曾喺「X」話，24年前第一次嚟香港，喺遊艇上做模特兒，第二次係今年9月，當時去澳門出席完新書活動後，再過境香港喺維港留念，今年11月，佢亦預告過今個月會嚟香港推廣新書。