【Emily】劉澤星受訪講童年 示範挑竹籤

【明報專訊】今個月起「坐正」港大醫學院院長嘅劉澤星，噚日喺醫學院「你問我答」短片分享童年回憶，講笑話自己「露晒年齡畀大家知道」。佢提到細個至愛玩意包括「掟豆袋」、「碌波子」，仲示範點玩「挑竹籤」，又話如果可以，最想變番讀中二中三嗰陣嘅自己，「嗰陣時係最開心㗎」。

劉澤星喺短片被問到，如果要點首歌畀醫學院同事同學生，會唱乜歌呢？佢揀咗偶像許冠傑嘅《沉默是金》，話好多時做嘢，努力就會做得好，「唔需要我哋去大肆鋪張」。佢亦揀咗披頭四嘅Let It Be，話做任何嘢順其自然就會開心。

講到電影，佢話細個鍾意睇石堅嘅戲，雖然佢每套都係做奸角，但片尾總會話「黃師傅（黃飛鴻），我真係對你唔住」，劉澤星覺得知錯能改係好重要。

劉澤星喺片尾提到加入醫學院30幾年，好開心可以為大家服務多幾年，形容醫學院就係佢嘅屋企，亦希望成為一分子嘅同事會感到驕傲、努力貢獻。