【Emily】海園人工授精繁殖瀕危牛鼻鯆 全球首例 BB今年4月出世

【明報專訊】海洋公園成功以人工授精方式繁殖牛鼻鯆，為全球首宗案例，經過61周2天嘅懷孕過程，名為April嘅雌性牛鼻鯆BB喺今年4月出世，?家喺園內嘅「海洋奇觀」生活，訪客參觀時都有機會見到佢。牛鼻鯆屬於瀕危物種，通常每胎只有一條，海洋公園話，由於牛鼻鯆嘅求愛行為比較粗暴，較難自然交配，而胚胎被吸收或胎死腹中嘅情况都經常發生。

今次嘅整個人工授精計劃以年計，園方喺2021年已為3條雌性牛鼻鯆檢查身體，仲要同其它雄性牛鼻鯆隔離，4個月後再做超聲波檢查，確保佢哋無懷孕。團體喺2022年2月開始人工授精，其後一直以超聲波檢查，監測牛鼻鯆嘅妊娠情况，其中一條雌性牛鼻鯆喺第20周確認懷孕。

海洋公園獸醫服務總監馬伯樂話，過程中冷卻同儲存精液嘅步驟尤其重要，亦係世界各地科學家致力研究嘅範疇，今次團隊克服技術障礙，係好重要嘅里程碑。