【Emily】橫跨中環至銅鑼灣 除夕煙花歷來最大

【明報專訊】仲有唔夠一個月就踏入2024年，旅發局話今個除夕會為旅客帶嚟「歷年最大規模」嘅香港跨年倒數盛會，喺維港綻放嘅煙花將會橫跨中環至銅鑼灣一帶，闊度達1300米，時間長約12分鐘，將係歷來面積最大、時間最長嘅除夕煙花音樂匯演。

呢次煙花匯演以四季為主題，5艘躉船會同時放煙花，銀白色象徵冬季雪花、豐富多彩象徵活力盛夏。除咗煙花，3座港島地標建築樓頂亦會喺除夕晚11點後，每15分鐘發放四色「許願流星」煙火，象徵甜蜜、健康、常樂、富足。

灣仔會展外牆屆時會展示巨型倒數時鐘，踏入新年一刻，全新創作編排嘅奏鳴曲會揚起，為匯演拉開序幕。除夕煙花音樂匯演將透過本地免費電視台、旅發局網站及社交平台全程直播。