【Emily】探知館嶺南建築展+故宮館明代畫展開幕 各有一級文物

【明報專訊】今個月有唔少新展覽開幕。由發展局、國家文物局、澳門社會文化司合辦嘅「同一屋簷下：嶺南傳統建築源流與藝術」展覽噚日開幕，主要介紹嶺南傳統建築，免費入場。另一個都係噚日開幕嘅展覽，就係香港故宮文化博物館嘅「故事新說——故宮博物院藏明代人物畫名品」，從故宮博物院繪畫珍藏中揀選81套明代人物畫珍品，分4期在港展出，每期約3個月。

「同一屋簷下：嶺南傳統建築源流與藝術」展覽展出170件／套來自粵港澳三地嘅藏品，重點展品包括廣東民間工藝博物館嘅國家一級文物「番禺神樓」，以及澳門博物館嘅套色玻璃窗、竹編建築裝飾組件等。展覽喺尖沙嘴九龍公園香港文物探知館舉行，展期至明年6月2日。

有唐伯虎文徵明名作

故宮館嘅明代人物畫名品展覽從今日起至明年11月30日喺展廳4展出，展出作品包括「明代四大家」之三——唐寅（即唐伯虎）、文徵明、仇英在內約60位明代名家嘅作品，有14套係國家一級文物，當中包括劉俊嘅《雪夜訪普圖》。觀眾同時可以參加講座，聽港方策展人同埋其他專家對明代人物畫研究嘅最新成果，仲有工作坊等可參加。觀眾可憑標準門票或特別展覽門票參觀，唔使額外購票。