【Emily】Google年度熱搜 蔡天鳳曾憲哲分列榜首

【明報專訊】過去一年發生唔少突發意外同天災，Google香港噚日公布2023年度搜尋榜，被殺害嘅蔡天鳳、JPEX、風暴小犬，分別成為熱門搜尋頭3則本地新聞頭條。一度失蹤、之後搵返嘅男拔生曾憲哲，以及富商劉鑾雄、指證韓國攝理教主嘅藝人方力申女友葉萱，就分別登上話題人物熱搜榜首三位，而好耐無露面嘅前特首董建華，同埋捲入欠債風波嘅前區議員張秀賢，就分別跟隨其後排第四同第五。

國際新聞方面，最熱搜嘅係加沙衝突，之後分別係土耳其地震同牀蝨事件。

今年香港取消防疫限制，唔少人「報復性」旅行同搵娛樂。最熱搜目的地天氣嘅地點依次係日本東京、大阪、澳門、韓國首爾、泰國曼谷。電影方面，十大中有6套港產片，票房大賣嘅《毒舌大狀》成為最熱搜電影，《白日之下》同捲入爭議嘅《給十九歲的我》分別排第二同第三。