【Emily】實政唯一候選人莊豪鋒落敗 田二少自責「無瞓身幫佢」

【明報專訊】實政圓桌立法會議員田北辰幾經艱苦，先可以保到一人參選區會，但徒弟莊豪鋒（阿Mark ）飲恨落敗。田二少噚日沉澱反思後同Emily講，「畀阿Mark 100分，選舉工作已做足，團隊亦好配合有100分……要怪就怪我自己……無瞓身去幫佢！ 」

屯門西選區4名候選人，噚日開票依次為民建聯鍾健峰（9426票）、工聯會徐帆（8608票）；及落選嘅莊豪鋒（7149票）同立法會議員何君堯支持嘅鄧德成（4903票）。

嘆無日日同徒弟開街站

田二少話，佢自己2021年選立法會時得票31.5%，莊豪鋒今次只有約25%，原因除咗因為整體投票率減少，佢話要怪責自己唔夠勤力。

田二少稱自己當年選立法會期間，每日早午晚開3次街站，但今次徒弟參選，佢有立法會職務在身，做唔到日日同徒弟一齊開街站，話如果自己勤力啲日日去街站，支持者見到佢真人，支持佢哋嘅多兩三個百分點，徒弟便有機會勝出。

如次次有兩大黨夾擊

嘆新制下細黨難生存

田二少話，佢哋呢啲細小政團雖能取得近三成支持度，但如果選舉次次都有兩大政黨夾擊，大黨均分選票，佢就算攞番三成票，係新選制下細黨生存係好困難。