【Emily】落淚談落選 宋芝齡：只不過係暫未能勝出 再參選否「未知數」 邵家輝讚選戰表現「101分」

【明報專訊】區議會選舉前日舉行，備受關注嘅灣仔選區，藝人宋芝齡敗選。佢噚日出席自由黨記者會時落淚，一度哽咽表示自己「未必係落敗，只不過係暫時未能勝出」，又話對區選成績感到滿意，覺得最大得益係可以到每區與市民交流。對於落選原因，佢話明白部分區工作唔夠深入，將來會做得更好。至於會唔會再參選，佢就話係未知數。

雖然區選落敗，但宋芝齡就贏盡黨友呵護。先有黨魁張宇人喺佢背後將名牌放喺佢頭上，落淚時獲旁邊黨友林偉文同梁進安慰，林偉文仲拖住佢手高舉以示支持。黨主席邵家輝就大讚宋芝齡選戰表現「101分」，並自責協助佢嘅部署同策略有不足。

拍檔安德尊現身票站

以往唔少候選人都會去票站等候點票結果，前晚投票結束後，Emily喺天后皇仁書院票站發現藝人安德尊，而佢嘅熒幕好拍檔宋芝齡就隔咗幾分鐘先現身。兩人一見面就雞啄唔斷，手舞足蹈，仲互相拍打對方面珠同埋攬攬，不時咬耳仔。宋芝齡見到鏡頭仲即刻舉心心手勢，任影唔嬲。

開票後，宋芝齡一度金睛火眼望實點票過程，安德尊就坐喺公眾席等候，不過再過多陣就唔見咗兩人，票未點完就齊齊先行離開。