【Emily】地產界巨頭 投票後紛打卡

【明報專訊】噚日區議會選舉，政商界名人唔止投票，多家地產商高層仲喺投票後有發新聞稿或透過社交媒體上載打卡相。當中恒基地產主席李家傑及李家誠更手持區選紙牌，於香港公園體育館票站外打卡，呼籲市民投票。李家傑話佢朝早8時半到香港公園票站投票，話過程順利，又稱投票準則係愛國愛港，並根據自己對候選人嘅認識去選。

李家傑：投票準則愛國愛港

鄭志剛：完善選制最後一公里

新世界發展執行副主席兼行政總裁鄭志剛投票後就喺微信上載打卡相片，並發文稱完善香港選舉制度已走到「最後一公里」，籲市民投下關鍵一票，選出最合適嘅區議員。

新鴻基地產主席兼董事總經理郭炳聯及執行董事郭基泓兩父子都有投票，郭炳聯話投票過程順利。盈科拓展集團主席李澤楷早上到山頂德瑞國際學校票站投票，佢話已盡一分力履行公民責任，希望市民踴躍投票。噚日未見長實高層發放投票打卡相，長實主席李澤鉅日前表態會投票，希望大家踴躍投票，並預祝選舉成功。

立法會地產及建造界議員龍漢標喺facebook發帖，話去咗投票，另外再上載多張照片，包括會德豐主席梁志堅及恒地高層。