【Emily】澳門媽閣站通車 香港鐵路迷排頭位

【明報專訊】每逢香港有鐵路新線開通，都會有一大班鐵路迷搶搭頭班車，原來呢群香港鐵路迷嘅熱情已經衝出香港！話說噚日澳門輕軌媽閣站首日通車，排頭位嘅乘客唔係澳門人，而係香港鐵路迷，頭班車噚日朝早6點半由媽閣站開出，我哋嘅香港代表早喺前晚9點就已經到場通宵排隊。

前晚9點通宵排隊

噚日媽閣站開通後，澳門輕軌氹仔線會正式連接氹仔同澳門半島，形成輕軌首段跨海路段。排頭位嘅香港鐵路迷林先生噚日接受傳媒訪問，話想親身見證呢個歷史時刻，所以特登早一晚過嚟排隊，又話好興奮，覺得媽閣站幾靚幾大。澳門輕軌公司噚日向頭500個乘客派發紀念品。

輕軌氹仔線列車日後會通過西灣大橋下層通道，由現有嘅海洋站延伸到媽閣站，車程約5分鐘。